नांदगाव ग्रामीण (प्रतिनिधी) - नांदगाव तालुक्यातील मंगळणे येथील ग्रामपंचायतीच्या मालकीची सरकारी गायरान जमीन गट क्र. १३४ क्षेत्रातील वादग्रस्त असलेले अतिक्रमण पोलीस बंदोबस्तात शुक्रवारी दि. ८ रोजी काढण्यात आले. मंगळणे ग्रामपंचायतीच्या मालकीच्या सरकारी गायरान जमीन गट क्रमांक १३४ मध्ये हरिदास पोपट पाटील यांनी ६ हेक्टर २५ आर क्षेत्रात अतिक्रमण केले असल्याची तक्रार संजय पाटील यांनी केली होती. या गट क्रमांक १३४ मधील क्षेत्रावर हरिदास पाटील यांनी अतिक्रमण केल्याचे सिद्ध झाल्याने अतिक्रमण काढण्याबाबतच्या सूचना वरिष्ठ अधिकाऱ्यांनी संबंधित ग्रामपंचायतीला दिल्या होत्या. शुक्रवार रोजी सदर अतिक्रमण काढण्यात आले . यावेळी विस्तार अधिकारी विजय ढवळे, वरिष्ठ सहाय्यक (लिपिक) दिनेश पगार, सहाय्यक पोलीस निरीक्षक मनोज वाघमारे, ग्रामसेविका हिमगौरी आहेर, वेहळगाव महसूल मंडळ अधिकारी जी. यू. काळे, तलाठी टी. एस. येवले आदींच्या उपस्थितीत काढण्यात आले. या क्षेत्रात बांधकाम करण्यात आलेले आरसीसी इमारत तसेच काही क्षेत्रात लागवड करण्यात आलेले कांदा पीक, मका तसेच ऊस पीक क्षेत्रामध्ये देखील जेसीबी फिरवण्यात आला. अतिक्रमण काढण्यात आलेल्या जागेवर यापुढे कुणीही अतिक्रमण करू नये म्हणून ग्रामपंचायतीच्या वतीने प्रतिबंधक फलक लावण्यात आला आहे. ग्रामपंचायतीने केलेल्या या कारवाईमुळे अतिक्रमण केलेल्या अतिक्रमणधारकाचे धाबे मात्र दणाणले आहे.
No comments:
Post a Comment