आदिवासी गरोदर महिलेला दिवसभर ताटकळत बसून ठेवले , नांदगाव शासकीय ग्रामीण रुग्णालयात संतापजनक प्रकार,

नांदगाव ( प्रतिनिधी ) - नांदगाव शासकीय ग्रामीण रुग्णालयात प्रसुतीसाठी आलेल्या एका आदिवासी गरोदर महिलेला अनेक तास बसून ठेवून , नंतर तिची फाइल बघून पेशंटचे रक्त चेक करावे लागेल असे कारणे सांगून दिवसभर ताटकळत बसविण्याचा धक्कादायक प्रकार समोर आलाय. येथील  डॉक्टरांनी सायंकाळी नातेवाईकांना सांगितले की, येथे प्रसूती होणार नाही. या संतापजनक प्रकाराची माहिती मिळताच युवासेना जिल्हा प्रमुख फरहान खान यांनी सोबत कार्यकर्ते घेऊन संबंधित डॉक्टरांना जाब विचारत धारेवर धरले. यामुळे ग्रामीण रुग्णालयाच्या वैद्यकीय व्यवस्थेवर प्रश्नचिन्ह निर्माण झाले आहे. 

     जामधरी येथून सोनाली आकाश मोरे (वय १९)हिला शनिवारी (दि.२१ ) सकाळी सहा वाजता प्रसूतीसाठी आणले असता,  तिला प्रसूतीसाठी दाखल न करताच तिला रुग्णालयाच्या बाहेरच बसून ठेवण्यात आले.  पेशंटचे रक्त चेक करावे लागेल, रक्त द्यावे लागेल आदी कारणे सांगून दिवसभर ताटकळत बसविले. महिलेची सीजर करावे लागणार असल्याचे डॉक्टरने सांगितले. सीजर करण्यासाठी आमच्याकडे प्रसुतीतज्ञ नाहीत. असे कारण सांगून या गरोदर महिलेला मालेगांव येथे जाण्याचा अजब सल्ला रुग्णालयाकडून देण्यात आला. पेशंटला दिवसभर उडवाउडवीचे उत्तरे देण्यात आली..

नांदगाव ग्रामीण रुग्णालयात प्रसूतीसाठी रुग्ण दाखल असतानाही डॉक्टर मद्यधुंद अवस्थेत होते. वेळेवर उपचार न मिळाल्यामुळे काही वेळ रुग्ण आणि त्यांच्या नातेवाईकांची मोठी गैरसोय झाली. ग्रामीण रुग्णालयातील कर्मचारी आणि डॉक्टर ऐकत नसल्याने युनासेना जिल्हाप्रमुख फहरान खान यांनी ग्रामीण रुग्णालयात तात्काळ धाव घेत प्रसुतीसाठी आलेल्या सोनाली आणि त्यांच्या कुटुंबाशी चर्चा केली. फरहान खान यांनी येथील डॉ. शांताराम राठोड यांच्याशी चर्चा करतांना डॉ.राठोड आणि अतुल आठवले हे दोन्ही मद्यप्राशन केलेले आढळून आले. नांदगाव ग्रामीण रुग्णालयातील एका डॉक्टरने मद्यधुंद अवस्थेत कर्तव्यावर असताना प्रसूतीसाठी दाखल झालेल्या महिलांना ताटकळत ठेवल्याचा संतापजनक प्रकार तालुक्यात प्रत्ययास आला आहे. या घटनेची दखल घेवून शिवसैनिकांनी रुग्णालयात धाव घेतली आणि संबंधित डॉक्टर आणि कर्मचाऱ्यांना जाब विचारला. संबंधित डॉक्टरला चोपही देण्यात आल्याचे समजते. दरम्यान, घडलेल्या प्रकाराची माहिती फरहान खान यांनी जिल्हा शल्य चिकित्सक डॉ. शिंदे यांच्या कानावर घातली व त्यातील काही व्हिडिओ त्यांना बघण्यासाठी पाठविले. जिल्हा शल्य चिकित्सक डॉ. शिंदे यांनी डॉ. शांताराम राठोड यांच्यासह प्रभारी वैद्यकीय अधीक्षिका डॉ. काजल तुसे, परिचारिका गिरीजा कुलकर्णी व कर्मचारी अतुल आठवले या चौघांवर निलंबनाची कार्यवाही करणार असल्याची माहिती दिली. फरहान खान यांनी प्रसुतीसाठी आलेल्या सोनाली आणि त्यांच्या कुटुंबाशी चर्चा करत त्यांना धीर दिला. यावेळी प्रसुती करण्यासाठी डॉ. तुसे यांना तातडीने बोलविण्यात आले आणि रात्री १० : १५ वाजता सोनालीची नॉर्मल प्रसुती झाली. तिने एका गोंडस मुलीला जन्म दिला. दरम्यान सोनालीच्या आईने नांदगाव पोलीस ठाण्यात तक्रार दाखल केली असून याप्रकरणी गुन्हा दाखल करण्याचे काम सुरू आहे.